Azərbaycana gələn miqrantlar nəqliyyat, tikinti və digər sahələrdə işləyir və ölkə vətəndaşlarının malik olduğu bütün hüquqlardan istifadə edirlər.
Azərbaycan BMT-nin işçi miqrantlarla bağlı komitəsinin Cenevrədə keçirilən 10-cu sessiyasına adıçəkilən məsələ ilə bağlı hesabat təqdim edib. Hesabatda son illərdə Azərbaycanın iqtisadi inkişafı ilə bağlı ölkəyə yaxın və uzaq xaricdən gələn miqrantların sayının durmadan artması və onların hüquqlarının qorunması məsələləri öz əksini tapıb. Sənəddə bu məsələdə Azərbaycanın dünyanın inkişaf etmiş demokratik ölkələrinin təcrübəsindən geniş istifadə etdiyi və miqrantlara aid bütün məsələlərin beynəlxalq hüquq normaları əsasında aradan qaldırıldığı vurğulanır. Sənəddə qeyd edilir ki, Azərbaycana gələn miqrantlar nəqliyyat, tikinti və digər sahələrdə işləyir və ölkə vətəndaşlarının malik olduğu bütün hüquqlardan istifadə edirlər. Eyni zamanda, Azərbaycandan xaricə gedən miqrantlar və onların vəziyyətinə dair də sənəddə geniş yer ayrılıb.  
”Ermənistan işğalçı siyasətinə görə cavab verməlidir”
BMT Təhlükəsizlik Şurasının Nyu-York şəhərində növbəti iclası keçirilib. Dünyanın müxtəlif bölgələrindəki, o cümlədən Cənubi Qafqazdakı münaqişələrə də geniş yer ayrılan iclasda ölkəmizin BMT-dəki Daimi Nümayəndəliyinin rəhbəri, səfir Aqşin Mehdiyev də iştirak edib. O,  “Beynəlxalq sülhün təmin edilməsi və təhlükəsizlik: vasitəçilik və münaqişələrin çözülməsi”nə həsr edilən müzakirələrdə çıxış edib. Bölgədə uzunmüddətli sülh və sabitlik əldə edilməsinə Ermənistanın düşünülmüş şəkildə mane olduğunu və təcavüzkarlıq siyasətindən əl çəkmədiyini söyləyən Mehdiyev Yerevanı hərbi güc işlətməklə Dağlıq Qarabağı ilhaq etməyə çalışdığını söyləyib. Aqşin Mehdiyev Ermənistanın işğal edilmiş ərazilərimizdə etnik təmizləmə apardığını və işğal altında olan qədim mədəniyyət abidələrimizi vəhşicəsinə məhv etdiyini deyib. 
Səfir eyni zamanda ATƏT MQ həmsədrlərinin vasitəçiliyi ilə aparılan danışıqlarda uğur əldə edilmədiyini və bunun əsas günahkarının da Ermənistanın olduğunu bildirib. Lakin BMT-dəki daimi nümayəndəmiz buna baxmayaraq, Azərbaycanın münaqişənin konstruktiv yollarla və ərazi bütövlüyümüz çərçivəsində həllində israr etdiyini vurğulayıb.